Samuel Lalmuankima

  Hmarsak kilah chengna a um,  Vanram tlafuol ngei chu. Himalawi tlângin a'n huolvêl a, Thal romei in a bawm chiei. A boruok innêm chiei el, Sik le sa in a tuom vêl. Umkhawsawtin fang ka tih, Tinkim biethu kan inhlânna.  A chun ka lungril a um,  A chun ka sakhming hriet a nih.  Chu ngei chu ka in a nih, Vankhuphnuoia sunhâng chîte a chun. Nipui hungin a liem a, Phalbi chun a boruok dei tak leh, A hung zuong lut, BER thla chu Hlimzâi kan vâwr hun a tlung. Meipui sepin thenruolhai leh, Duthu tinkim samin khawvêl kan rûn, A nih, tapna hrim hriet a ni nawh, Ka lunglai hluotu Sielmat-ah. Kayangulam HO 21 November, 2020

  Mîm ang ka piengna ram hi, Ka khuol zinna chau a lo nih. Innghet bawl tuma ka'n rimna kha, A thlawn, la bo nâwk el ding; Ka sawm thei pakhat khawm um lo. A hi a nih ka hla tâwp chu: Ka sandamtu'n a mi hriet a, mi lo hmuok a tih, Mi lo lawmin a kuomah châwl ka ta, In inrimna inzo pha la'n tuok ei tih; Hlim tâwp umnawna ram ngeiah.  Ka hun a tlung, kona chu ka dawng tah, Ngai leia inchel thei ding ei ni ta nawh. Mi'n thla inla, hadamin pan ka tih. Aw, pan ka tih ka chatuon ram; Ka'n tlansiekna chu ka muolsuo tah si a. A nih! Ngaiin mi ko in ta, Dawnzai rêng rêl naw ning. Ropuina ramah ka leng ta awm si a. Ka nu, ka pa, taplai bâng unla, Lawm ro, ka in ka tlung tah.  La boral dinga hin nina ka nei nawh, VÂN KHUO LE TUI ka ni lem. A chun nina ka nei- LAL NAU ka nih; Dawn naw thei am ka nih kona? Tap zai bang ro, ka in ka tlung tah. Phungruol hungin, tin an ta, Khawsawtna hungin, umhmun khuor a tih. Sienkhawm damte'n hunin la her liem ata, Ka sakhming sirah hnâwlin...