Samuel Lalmuankima

  Invet inhnelna tiin inbûk hai sienkhawm, A pawinaw ie intlaw ni khawm chu. Hmangaina hin kum a ṭhe si nawh, A thlawnin ka lunglaia hin cheng zing de nih! Suongtuona ruoma um zing ka nuom, Ṭhanghar a lo ṭul nawk hlak si maw! Ka ta a ni sûng a tawi ngei ie; Tawnmang, kar lova bo el hlak hi.  A chun Hrangsuon le Chawngmawi angin, Hallote'n kan leng za, vânthengrengah; Inthim a zuol po leh, kan var zuol det na, A ta ka nia, ka ta a nina ruoma chun.  Thlazîng 09, 2021 Kayangulam HO

  A nuimawi hmel hlie a chun, Thawnthu ngainuomum tak a um. Iengtin am thalkaptuhai hnein, A thalngul dettakin ala ngir zing a? A khawvel chu lâkpek a ni a, A sakhming ṭhatna sira hnawlin; Det takin a ngir suonglung chungah, Mi lien insa reiin an phet thluk zo lo. A ta di'n lung bang rem khumin, A kau ra tak tak hai an satthlak a; Sienkhawm zung det taka kei lo niin, An dâwn suok, an vuiliem hnung chu. Inlalna le thuneina'n hliekhuo tumin, An tlân dawk thukhel khekpuiin. To ṭawka thoin chu mi nu chun, A pârmawi insuoin lan zâr nawk a tih.   A kut sininrimra chu malsawmin, A chunghnungtak i hriet a nih. A thawnthu mangangthlak ruok chu Sakhmel ṭhatak hliea thuphmang a nih. Thlazîng 09, 2021 Kayangulam HO 

Hi hla hi hla inlar ve em em le ei sak ngun em em a nih. A phuoktu hi George Matheson a ni a. Hun tawite sunga a phuok zo nghal a nih. Ama hril dana lem chu minute 5 sung vel chaua a ziek suok le a hnungin a thu hi thleng danglam le siem danglam a nei nawh.  George Matheson hi naupang lekhathiem thei tak a ni a. Kum 19 a hung tling lem khan chu graduate ding ni el bakah a hmangai tak leh an inhuol a.   Amiruokchu, makdanglam takin hmatieng eng tak nei pa kha a khaw hmu a hung buoia, a mit a hung inthim ṭan a, doctor hai chun sukdam dan ding an hriet nawh. Chuonga lunga deng thu a hriet lai chun inhnemna dingin a hmangai tak tieng a ngha a, anachu a beisei lo tieng daiin a hmangai tak chun a maksan lem dai a. Mitdel nuhmei a ni theinaw ding thu a hril pek nghe nghe. Matheson ta ding chu thil mak le thil awi harsa, thil pawm intak tak el a nih.  Chuongchun, kum a hung fe pei a, kum sawmhni a hung liem meu chu, a unaunu pasal nei hun a hung inherdawk a. A urlawk ni chun...