Samuel Lalmuankima

  Hringnun mawina hi ieng am a ni a, Karlova bo nawk el hlak hi? "A va mak de aw" tiin ei liempei a, Thina dâr eini di'n an ri zing el si. Hlun lo hi mawina a ni si chun, Iengleia thina tûr hi na am ana? Hi varuom inthim hi hraw ngun khawma, Thlafam ngaina a zuol det nawk si. Khawvel inthima lawmna tak a um nawh, Tûktin par anga tlo lo a ni si a. Tâwpna lawmum hi um thei ngai am? A chu Kristaa chau a um. 25 Thlahmur, 2021 Kayangulam HO

Ka tarmit ienga ka mit sukfietu, Ka khawvel rawng neilo cheimawitu; Nang ang sakhmel fâng ang ṭha, Nu sula insieng thei ngai ni maw? Mi hrietin i bûk rik naw sienkhawm, Kei di'n i bûk tawk lunghlu i hlen. Tlereu thil le puon ka hni naw che, I hmangaina kei di'n a hun. Inkawp ding renga khuonu ruot, Kim lo mi suk kimtu i nih. Hiek ka ni a, mi semdartu Thai bovin, imi suktling. 22 Thlahmur, 2021 Kayangulam HO

Inchûklâwkna um lo hringnun hi, Sieli khawmawi ang chau el an nawh.  Tinkim duthu sâm hlak inla khawm, Per zep thei annawh ei duthusamah.  Ei tum ram ei panna lampui hi, Mi hniekhnung zui ding um lo; Mani lam ding sât fâwm peiin, Zân a ni hma'n khuo tlung thei ei ti'm? Tlû loa hraw muolsuo thei ni bawk lo, Hi lampui zâwldiai inzâmna hi. Tho nawka pût thar nâwk khawmin, Hlawtlingna muol dangah a lêng. Takchapa! Tho nawk rawp e! Hlawtlingna'n mi mâksan sien khawm, Kâwlah nisa la hung suok nâwkin Kan dipui pâr hun la'n ruol a tih.  Sim thing hmana pâr hun a nei chun, Pâr ang la vul a tih kan rimna. Hi beiseina ditum hi lo thlawn sien, Hlawsam khawma hmasawnna um a tih. 15 Thlahmur, 2021 Kayangulam HO

Angel hai anga thla neia indinin, A hmel nisa ienga var suokin; Hringmi laia pathiennu, ba êk ang ngo, Fâng ang tha a pieng tlângmawi. Vanchunglaizuor, tu am kan ṭha taka? Haifienin tui ka hung chawi ie. Zuopa zawna hai khawm pal tlangin, Tlumte fielna ruok chu hnawlin.  Inkawp dinga ruot ni siin, Sûmhai fe khêl thei si lovin; Lam sak ka hraw, lam thlang ka baw, Ka vapuolte kan hmang ta ie! Ditthlangtheina piengpui hrim, Thaibo pek di'n tu am ka na? Dit luot leia a thla suk tliek nekin, Hmangai taka invuongtir a ṭul lem ta si. 03 Thlahmur, 2021 Kayangulam HO