Samuel Lalmuankima

Thangvân sânga sûm inlêngvêl ha'n, Chulram fang di'n an mi ko. In ta hnung hrietna hung thoin, Ditthlang thei loin ka zui. Ka nei po po inhlâna i bân chel khan, A awi ngei ka lunglai rûk. Khawvêlin kei di'n a parmawi a'n suo, I mi lêngpuina ramah, Sieli. Sungril lawmna hrilin siek  sien, Lungthuo a hin ker ka tih. Zîng tinin buon lang khawm, Zo naw ning buonpil chang chen khawmin. A bul umin tâwpna a nei angin, Lampui ngîl tak chun rawl bang a baw. "Chel tlat e" ti zing siin Sûm tui pâinaw iengin thli i zui. Chuoilo-pâr a chuoina hring khawvêlah, Thawidam ka tih ka lunglai hi; Khawvêl pârmawihai khawm hi, Hlun lo an ni leia mawi an ni lem si. 28 Thlado, 2021 Kayangulam HO

Ka khawvêl ruo a sûr chânga ka sumrisâng, Zan thim rinum laia nisa suok mawi tak, Ka lopuia Ṭampui innotak ang a nih.  A hmêla chun thingtin pâr ang an vul a, Zu le va hai lunglawmna a nih.  Ar'si hai neka mawi lema indin a ni a, A mawina thup di'n zanthim khawm a tlâwm. Thla le arasi'n chibai an bûk a, A hmêl var chun mi sun eng sienkhawm, Mihring di'n a mawina thuphmang a nih. Mengte hringna zât nei lang khawm, A rênga i kuoma hmang zo ka nuom.  Hi thuhai hi hmu in hre la chu maw, Suongtuona chaua chang che hi vâl hi, Meichawk thlir el di'n mi phal naw ti nih! 26 Thlado, 2021 Kayangulam HO

Ei hun a tlung hma'n ei intawng a, Tak chang di'n theitawp suoin; Sienkhawm hun inher dang ruol ni lo, Kara hmangaina'n hlamzuiin fam a chang. Inkawp ding rawm ei insâwn a, Inhermil tuma pu hrâm hrâmin, Chung siara inziek ei nih tiin; Bêngbereptuhai tu in am a hmang suol ta a?  Mihring mi suk hringtu ka lungphu, Keima ding chau nilovin, ei pahni- Nang le kei di'n a'n phu a; Ei inkawp hlak rem chuong si lo. Hringnun rêl dan hi a mak ngei! Khuonu rêl danah inrawl rem si lo; Kumhai liemin nihai liem sien, Sunhânghai hi la tiem thiem ei tih. 09 Thlado, 2021 Kayangulam HO

Nisa suoka, nisa tlâkna hlaka hin, A takbit hrim a um nawh. Ngûr nun ienga nunkhuo phâmin; Hlimna puopa chau a pêk. Lemchangna zâwl hi fe khêlin; Takna ram zuonglut thei lang aw! Mawina ei hnawt lawp lawp hi; La bo ding, sûm zing ang chau. Dittak Kalina, mi thuoi la, Mi le nêl lo fe khêlin, Lemchangna ruom pal tlangin, Kawpte'n leng ei, Kumandra ah. Thlado 05, 2021 Kayangulam HO