Aw hmangaina mi'n thlanawtu (KHB 261)

Hi hla hi hla inlar ve em em le ei sak ngun em em a nih. A phuoktu hi George Matheson a ni a. Hun tawite sunga a phuok zo nghal a nih. Ama hril dana lem chu minute 5 sung vel chaua a ziek suok le a hnungin a thu hi thleng danglam le siem danglam a nei nawh. 

George Matheson hi naupang lekhathiem thei tak a ni a. Kum 19 a hung tling lem khan chu graduate ding ni el bakah a hmangai tak leh an inhuol a.  

Amiruokchu, makdanglam takin hmatieng eng tak nei pa kha a khaw hmu a hung buoia, a mit a hung inthim ṭan a, doctor hai chun sukdam dan ding an hriet nawh. Chuonga lunga deng thu a hriet lai chun inhnemna dingin a hmangai tak tieng a ngha a, anachu a beisei lo tieng daiin a hmangai tak chun a maksan lem dai a. Mitdel nuhmei a ni theinaw ding thu a hril pek nghe nghe. Matheson ta ding chu thil mak le thil awi harsa, thil pawm intak tak el a nih. 

Chuongchun, kum a hung fe pei a, kum sawmhni a hung liem meu chu, a unaunu pasal nei hun a hung inherdawk a. A urlawk ni chun, kum sawmhni liem taa hnawla a umna chu Matheson lungrila a hung in ling thar a. Tuhin chu Matheson chu "mitindel thuhriltu" (blind preacher) tiin hming a lo ser taa, a thuziek ṭha tak takhai le a thuhril ngainuomum tak takhai leiin mihai lai an lar ta hle. Amiruokchu, hieng ang khawpa a rawngbawlnaa hlawtling nisienkhawm, a lungril natna chu a bûk kâng hne nawh. A khata a ina a um lai chun, Matheson chun lungrilnatna lientak el hi a nei a. A siruk lâk ti thei hiel ning a tih.  

Chun huna chun a nih, "Aw hmangaina mi'n thlanawtu" ti hla a hung zieksuok hi. 

Hi hla mawi em em hi Pathien hmangaina lawmna hla a ni a, ruo laia sumrisâng inzâm anga natna huna hlimna hung suok le hnuoi ṭawla pâr hung kak suok ang a ni thuhai a hril. 

Matheson a hla hin hmangaina ringum, danglam thei lo, hringnun hun harsatnaa khawm um zing le ei lungngaina hai po po  ei bunthlak theina hmangngaina indiktak thu a hril. 

Hi hla hi ringna hla, hmur ṭawl taka inthawka hung suok, mitvarna neilo ta ding khawma hmutheina petu a nih. 

Mathenson chun a lungrilnat em em laia a hla phuok thu chu hieng ang hin a hril. "Ka thuziek lai po poa ka zo awl tak a nih. Keima ziek suok el ni lovin, sungrila rawlin ka kuoma hin a hung hril suok niin ka hriet. Minute nga sunga ka ziek zo vawng a nih ti hi ka chienga, siemṭhat le them danglam um der lo a nih. Ziek tienga thilpek dawng ka ni nawh. Thu dang le hla dang ka ziekhai hi siemsuok vawng an ni a, hi ruok hi chu chungtienga inthawka tuihnar hung pût ang a nih."

Matheson a hla chun mi tamtak lungril a them a. An lar hle.

Eini khawm, ei ta dinga ni lo mi dang dang ei hmangai a, thutiem puitling lo, lungril kawidarna chen ei tuok a. Ṭhenkhat chu ei hmangai takhaiin râl angin an mi do a, a ṭhen ruok chu 'arasi' la pêk ding hiela inhrilin, hun sawtnawte sungin 'arasi' lâk pêk ding dang an lo hmu nawk hlak. Chuonga inṭhena kâwl a hung êng pha chun ei zawi tawpa, bufâk khawm an hnik ngai nawa, zingkhuo var ding hawphur ngawi ngawi châng khawm ei nei hlak. 

Ei ta dinga khuonu ruot ei zawngnaa hin chi dang sengin ṭhang ei lak hlak. A chang chu hnawlin ei um a, thil chi dang dang ei paltlang a, ei lungril ngaituona chen khawm ei inhmang hlak. A chang chu hnawlin ei um a. Ei hmangaina kha an lungril a tlung phâk si nawh. Beidawngna in a mi bâwm rawp. Ei kûn tlawk tlawka, hnuoi ei en leh a dawng. Khawvelin ei sinthawṭhat leia lawmman a mi pek laiin sungril natakin ei um rawp. 

Hmangaia mi'n thlanawtu ding chu tawnmang thil chau a hawi. A tak ni dingin awi a um naw taluo. Amiruokchu, ei lungril hliemhai Pathien kuomah ei inhlan chun, a hmangai tuipuia min luongtir ve in, a mi suksip hlak.

 

Aw hmangaina mi'n thlanawtu,

Nangma ah ka thla châu a châwl;

Ka pêk kir che ka nun bat chu,

I hmangai tuipui inthûkah,

Luongin sip zuol raw se.

https://askherabouthymn.com/what-hymn-was-written-by-a-lovelorn-scottish-preacher/