A ṬHA IE!

Kristien Hlabu (Tonic Solfa) No 354 hi chu a chîn a lienin ei inhmelhrietpui hle ring a um. Hi hla mawitak le ṭha em em hi Horatio Spafford in a phuok a ni a, a hlawtling em leia a phuok ni lovin, a nei po po a chân a, chu huna a phuok dawk a nih. A nau pasal a chân phawta. Chu zoah a dawr chu kangmei suokin a kang ral a. Chu hnungah, a naunuhmei palihai le a nuhmei chu lawnga an chuong lai an lawngin tuoksiet a tuoka. A naunuhmeihai po po nikhat thilthuin a chân vawng a, a nuhmei chau chu a damsuok a nih. Chuong ang hun khirtak a pal laiin, "Ka thlarau ta dingin a ṭha ie" ala zuk ti thei a ni chuh!

Thuthlung Hluia Job chanchin khawm ei en chun a nei po po a chân titâk lovah, ama ngei khawm nasataka suk natin a um a nih. A nuhmei ngei khawma Pathien hril sie a thi el dingin an fui hiel a ni kha. Amiruokchu Job chun a nuhmei a khak lem hlau el.

Ei dit ngawi ngawi ei chân hin chu "A ṭha ie!" ti chu an tak a nih. Ei ruolhai chânnaa chu a ti a lo inhawi deu rawi mawh. Amiruokchu, mani ngeiin hi lampui ei hraw hunah, "I ditzawng ang peiin thaw raw" ti chu thil harsa a nih. Chuonga ti nêk hman chun ei ta dinga ṭhatak ei hriet ni awm fahranin Pathien ei hni tlut tlut rawp hlak. Lalpa ṭawngṭaina ei hril huna, "I ditzawng vana mi'n an thaw angin, Hnuoia mi'n thaw raw hai seh" ti le chu ei kar a hla nuom fût annaw. La hung hêm danglam meta, ei chân naw dan dingin ei ngen lem rawp. Thil inthla hi ei phal ngai nawh. Pathienin kawt a mi khar pek hnung khawma la nawk ṭâwk ṭâwk hlak hai ei nih. A ditzawng thaw nekin ei ditzawng thaw dingin Pathien ei mawr rawp. 

Hla siemtu'n "Ṭapna reng a um ta nawh, Lungngai mangang buoinahai, Ama le kan inpâwl chun, Damsung ka tuok taphawt hi, Lawmna ding ruok a lo ni si" a ti ang hi chu tiem thlak pur amani, zuk sak zo pup chu a awl hle a. A zâwm ruok chu thil harsa tak a nih. Pathien ei zui naa hin lam inhawi ei va hraw kher kher naw ding a nih. Lam inhawi a mi tiem nawa, amiruokchu, "Immanuel" a mi tiem lem a nih. Iengang harsatna khawm tuok inla, mal taka umin inngai hlak inla khawm, malin ei um ngai nawh. Immanuel- ei kuomah Pathien a um! 

Missionary inlar em em Hudson Talyor khawm a hmangai em em a nuhmei Maria Jane Taylor chun cholera invawiin a thisan a. A nuhmei thina chun Hudson Taylor chu nasatakin a suk hning a nih. Amiruokchu, a lekhathawn pakhata hieng hin a zieka, "Ama chauin ei hmangaihai hi ei ta dinga an hlutzie a hriet. Ei mita var le ei lungril lawmna an niah a um ti chu Ama in a hriet. Amiruokchu, Ama chun ei hmangaihai chu intienga ṭhuoi an hun tah ti a hriet a, anni ta dingin a ṭha ti A hriet a, A hmangai em leiin hadam takin a ṭhuoi an tah. Ei ta ding chun ṭha lo angin an lang hlak. Anni bo chun mal takin ei inrim a ngai a, amiruokchu, malin ei um nawh. Pathien chu a hma neka nasa lem, a hma neka hnai lem hman hmanin ei kuomah a um a nih." Ei ta dingin vân a chim rawm ei sawn hlaka. Pathienin a mi hrietfuk ta naw amani sawnin ei nuor ngawi ngawi châng a tam hle hlak. Ei ditzawng, ei lungrila tum dan anga thil a hung tlung naw lem hin chu mawsiet ding ei zawng tei hlak. Amiruokchu, ama chun ei ta dinga ṭha a hriet a nih. Hnuoi le vân le a sunga um po pohai siemtu hin ei hming a hriet a, ei hmatieng iengthil am a hung tlung ding, iengtin am hringnun a hung inher pei ding ti hre naw inla khawm, ei hmatieng cheltu chu Ama ana, Ama chu ei hriet. 

Vawisun hin i tum angin thil a lo tlung naw el thei. Lungrilna le beidawng ngawi ngawiin ium khawm a ni el thei. Anachu chungtieng en raw. Peter khawm a sir le vêl a en khan a pil vâng vâng a ni kha. Isu en raw, a hmela damna lei chun in pâk awm sih a. A hmeltak i hmufuk pha chun, "Ka thlarau ta dingin a ṭha ie" ti thei ngei i tih. 

Eventide

Tuolbuol 24, 2022