Pathien thutaka hniek phawi loa ngir: John Fullerton MacArthur

Kum 1939, June ni 19 khan, Los Angeles, USA ah, rawngbawltu insungah a pieng a. A hmingah John Fullerton MacArthur an sak a. A pa Jack MacArthur le a puhai hi rawngbawltu ringum em em an nih. Naupang te a nia inthawk Pathien thutak le hlahaiin an huol vel a. Pathien thutak ngaipawimawna lientak a nei pha.

Amiruokchu, John MacArthur hin a pa le a pu anga rawngbawlna sin thaw dingin an ring naw a. Chu nek hman chun ama inhnikna, American football inkhel a nuom lem a. Amiruokchu, ama ta dingin Pathienin thiltum dang, thiltum lien lem a nei a. Kum 18 a niin, car accident  a tuoksiet a tuok a. Ama chu damsuok sienkhawm, hi thil tlung hin a hringnun a thleng danglam a nih. Natna khuma a zal lai chun kona a dawng a. Khelmuol a ni loin, pulpit tienga kona a nih.

Chuongchun, kum 19 a niin bus station tuol lai thu a hril tan a. A thuhril chu a tak a, a pehel naw bawk, amaah inhnikna lientak a um ti hriet theiin a um bawk a nih. 

Kum 1963 in Talbot Theological Seminary ah M.Div a zo a. Hi kum ma hin Patricia Sue leh an innei a. Nau pali neiin, tu le tu sawng tamtak an nei.

Kum 1969 in Grace Community Church, Sun Valley, Californiaah Pastor sin thaw dingin fielin a um a. Hi taka inthawk hin a nih a rawngbawlna a hung parvul tak tak ṭan chu. Mi inngaitlawm tak le thuhnuoirawl tak a ni a, inlarna le hming inthangna a hnawt naw a, a thiltum lientak chu ringum taka Pathien thutak hril a nih. Ni le thla le kum a hung liem pei a, Pathien thutak a bat batin, chang indawt peiin a hril pei a. A thuhril ngai dingin mipui an hung khawm a, an ngai a, an inṭhanglien pei a. Kohran khawm an pung pei bawk a, hlimhlawpna le ennuom um thil lei ni lem loin- thutak a hril leiin a ni lem. 

A rawngbawlna chu kohran pakhat, biekin pakhata chau ni ta lovin a hung inthang pei a. Radio, cassette, CD le internet hmangin “Grace to you” ti hming inbukin mi tamtak kuomah thu a hril a nih. A thuhril a fie a, khawvel thilhaiah a kûn naw a, khawvel inthlakdanglam zingah Pathien thutak inthlakdanglam lo chu a ni angin a hril a. Buoina nei tamtak an fie pha. 

Kum 1985 in The Master’s University  an din a, a kum nawkin The Master’s Seminary an din nawk bawk a. Hi inchukna hmuna hai hin kohran thuoitu le ringtuhai Pathien thutaka inthuomna dinga an din a nih.

A dam sungin John hin sermon 3300 lai a hril a. A thuhril hi expository sermon ei inti, Bible chang a bat bata hrilfiena leninchuktirna a nih. Lekhabu 400 lai zet a ziek bawk a. Eini laia ei hmang inlar MacArthur Study Bible le Thuthlung Thar commentary hai khawm a ziek bawk a nih. A lekhabu ziekhai khawm hi inlarna hnawta ziek ni lem lovin, mihaiin Pathien thutak hi man fu hai sien a nuom lei a ni lem.

Pathien thutaka insawn loa dettaka ngir a ni leiin sawiselna khawm a tuok hrim a. Huoisen takin charismatic  movement dam, prosperity theology dam, woke culture tihai khawm a sawisel a nih. Chun, COVID hripui inleng lai sawrkarin biekin khar dinga a ti lai khawm, MacArthur hin huoisen taka kalin, an biekin a hawng a, inkhawmna a nei pui zing a nih. Ama chun, “Biekin hi thil pawimaw, ‘essential need’ a nih. Kohran lu chu Krista a nih, Kaisar ni lovin” tiin huoisen em emin a ṭhang tlat a nih. A ram roreltuhaiin dan hmangin an kal a chu, dettakin a ngir a, hnena a chang bawk a nih.

Kum a hung fe pei a. Upat tieng a hung pan ve pei a. Taksa hrisel nawna in a hung tlak buok a. A hun ler tienga khawm, Pathiena a ringna chu dettakin a chel zing a. Hratnaw le chau, rawl inthin dawr dawr pum khawma Pathien thutak a lan chuktir rawp a nih.

Kum 2025, July ni 14 khan, kum 86 mi niin kum 50 lai a rawng a i bawl Pathien kuomah chawl hadam dingin hi hnuoi rinum hi a lo maksan an tah.

John MacArthur hi kumzabi 21 a evangelical thuhriltu le inchuktirtu ropui tak hai laia mi a nih. Doctrine thuah Reformed (Calvinist) niin ruotlawk chungchangah eini leh ei in dang deu a. Amiruokchu, chu ti lo chu a danga chu ei inang deu phuor. Ringna leia lunginsietnaa sandam le sandamna lampui umsun chu Isu Krista chau hi a nij ti hi a pawm det hle a. Eschatology a chu ama khawm pre-millennial a ni ve.

Pathien thutaka inhning loa ngir det tlatin, huoisen takin Pathien rawng a bawl a. Kum 56 sung zet pulpit a ngirin thu a hril a, ama chanchin hril lovin, Krista chanchintha a hril a, Pathien khawma nasatakin a chawimawi ve a nih. Ei khawvel se tak, tamtakin ei rilrem zawnga Pathien thu hermil an tum lai, John MacArthur chun khawvel fe dan zui lovin, Pathien thu a ni ang takin a hril a, hmingsiet le dem ṭi lovin, a thi chenin Pathien ta dingin ringum takin a ngir a nih.