Public Provident Fund (PPF)

Public Provident Fund (PPF) hi iem ana? Iem a thatna?

PPF hi kum 1968 a inthawka tan a ni a, hi hi thil tum tak chu mipuiin tangka tlawm te te an inkhawlhai sukpung le suk hlawk a nih. Eini rawi chun sie (tax) ei chawi naw a, amiruokchu khawpuia um, sie chawihai ta ding khawma an sie chawi an hmu kir theina ana, sawrkara mi a ni lei hin ringzo a um hle bawk a nih.

Iem hriet tul?

PPF account hi a nuom phawtin ei hawng thei a, naupang kum 10 chung hai khawma nu le pa amanih, a enkawltu (guardian) fe thlenga hawng thei a ni bawk. Naupang a ni chun kum 18 a tling hma po chu a nu le pa hai (parents/guardian) hnuoia enkawl a ni ding. Amiruokchu, mi pakhatin account pakaht chau hawng thei a nih. Hi taka a pung hi 7.1% a ni a, account hawng ding hin a tlawm takah cheng 500 sung a ngai a nih. PPF a hin kum tin vawikhat bek pawisa sung a ngaia, kumkhat sungin ei sung der naw chun penalty a um ding a nih. Chun, tangka sung thei zât hi a tlawm tieng cheng 500 le a tam tieng takah cheng 1.5 Lakh chen sung thei a ni bawk a, kumkhat sungin vawi sawm-le-pahni transaction thaw thei ti lo ni hlak sienkhawm, dan thar a chu kumkhat sungin nuom zat zat transaction thaw thei a ni a, amiruokchu, sung thei zat cheng 1.5 Lakh a pel thei nawh. PPF hi a puitlingna ding hin hun a lak sawt a, kum 15 sung zet sung a ngai a nih. Chu zo khawm chun kum 5 peia keisei thei a ni bawk. 

Khawlam hawng thei?

PPF hi Post Office a hai hawng thei a ni a, chu nawa khawm nationalized bank hai le HDFC, ICICI le Axis Bank a hai khawm hawng thei a ni bawk a nih.

A puitling hma in keidawk thei a ni am?

Account I hawnga inthawka kum 5 hnungin kum 4 liemtaa I pawisa nei amanih, a kum hmasak (nikum) a I pawisa nei (a tlawm lem lem) 50% kei dawk thei I tih. 

Lo khar nuom inla teh?

I account a puitling hmaa I lo suk tawp nuom a ni khawma, account I hawng nia inthawka tiemin kum 5 hnungah I suk tawp thei chau ding a nih. Khawm chun,  nang amanih, I nuhmei/pasal amanih, I nauhai amanih, I nu le pa amanih natna inrik taka an nat lei annawleh I nauhai lekha inchuk sangna ding leia I mamaw a ni chun keidawk thei I tih. 

Hi account hawng ding hin ieng iem a tul?

Passport thlalak, identity proof le address proof a tul a nih. Chun, account ei hawng ding hin AOF (Account Opening Form) ah nominee hming ei ziek a tul bawk a nih. Iengleia nominee hming chu a tul kher am? Khawm ei lo ti el thei. Mihriem chu siet tuok thut thei zing ei ni leiin, chuong thil chu a lo tlung khawma ei sum inkhawlhai inhmang loa ei sunglekuo haiin an lakdawk theina ding a nih.