CHARLIE COULSON: The Christian Drummer Boy

 

Charlie the drummer boy chanchin hi inlar ve tak el a ni a, a lo hre tah khawm ei um nuol ring a um. Ama hi kum 16 mi chauin thi sienkhawm, a chanchin hin mi lungril a tawk em em a, vawisun chen hin ama um ta naw sienkhawm, a chanchinin thu a la hril zing a nih.

American Civil War lai khan United States Army ah Dr. M.L. Rossvally chun surgeon sin a thaw a. Gettysburg hmuna indonaa lem khan chu sipai za tamtak a hliem an um a nih. Chu laia chun mi 28 hai chu inriktakin an um a. A ṭhen ke bawng, a ṭhen kut bawng, a ṭhen kut le ke bawng leh; an kut le kehai tan ngai dam an ni tawl a. Chuhai laia chun tleirawlte pakhat, sipaia thlathum chau la ṭhang hi a um a, amiruokchu, sipai dingin ala naupang em leiin khuongvawtu in an hmang a. Ama chu a ke le a kut tan a ngai a. An tan sung a nat tuor ṭhangpuina dingin zu pek an tum leh a nuom naw a. Doctor thupek a nih an ti leh doctor a hmu nuom thu a hril pek

a.

Doctor pa chun indona hmuna an hmu khan san thei dingin an ring ta naw thu a hril a, amiruokchu, hmel inno em emin, mit pawl riei el a zuk hmu khan hi tleirawl pa hin nu a nei ngei ding ana tiin indona field a tleirawl thi dinga maksan el nekin tiin enkawl dinga a lak thu a hril a; a thisen a suok nasat em leiin operation chu nat sawkna boin a tuor zo a ring naw thuhai a hril pek bawk a.

Charlie chun a kut chu doctor pa kut chungah innghat in, doctor pa chu a zuk en a. Doctor pa kuoma chun kum 9 mi chau a ni lai, Pathienni zantienga Isu Krista tadinga an hlan thu a hril a. Chu taka inthawk chun Isu Krista chu ringin, natna khuma a zal lai khawma ala ring zing thu a hril pek a. Operation lai khawma ama chun vengin a umpui ding thu doctor kuoma chun a hril bawk a.

Amiruokchu, doctor pa chun zu tlawmte indawntir a tum ṭal a. Charlie chun doctor pa chu enin a kuomah, “Kum nga mi chau ka ni laiin ka bulah ka nu chu dingṭhaṭhuonin, Pathien kawlah a mi ṭawngṭai pek a. Ka pa kha zu ngawlvawi a thi a ni a, keichu thingpui le coffee ti lo chu dawn chi dang hrim hrim dawn lo dingin a mi ti a. Kum 17 ka ni taa, vawisun chen hin zu hrim hrim ka bauah ala lut nawh. Tuhin nangin zu leh ka Pathien hmaah i min ngir tir tum maw?” tiin a hril pek a.

Khang hunlai khan doctor pa chun Isu Krista hi a hmu pei naw a. Amiruokchu, tleirawl pa in a sandamtu a hmangai ziet le a ring ziet a hmu chun doctor pa lungril a them hle a nih.

Chuongchun, chaplain pa a hmu nuom am tiin doctor pa chun an dawn taa. Charlie chun a hmu nuom thu a hril bawk a..

Chaplain pa chu a hung chun Charlie chu ṭawngṭai inkhawm a hai a hmu zing zing a ni leiin a zuk hriet nghal a. Charlie chun doctor pa in zu a pek tuma a hnawl thu hai hrilin, a sandamtu Isu Krista chu a nina ang taka hmu a nuom thu hai a hril bakah, a lukham hnuoia Bible chu Pastor pa kawlah la dawka, a nu thawn dingin a hril a. Chun, lekha khawm thawn sa dingin a ngen bawk a, chu lekha a chun a nu kuomah nitina bible a tiem hlak thu le a ṭawngṭai zie hlak thu hai hril dingin a ti a, a nu ta dinga a ṭawngṭai hlak thu khawm hril sa dingin a ti bawk a.

Thil dang ala um am tia an hei indawn chun, Sands-street Sunday-school, Brooklyn, N. Y., a an superintendent kawla lekha thawn dingin a ngen nawk a. An fuinahai le a ṭawngṭaina hai a theinghil naw thu le Pathienin malsawmna tamtakin vur sien a ti thu hai a hril sa bawk a. Chu zo chun Doctor pa kuom tieng enin operation thaw dinga an ring tah thu a hril pek a.

Operation thaw sunga ri iengkhawm a siem naw ding thu khawm a hril pek nghe nghe. Doctor pa chun a hawphur luotin operation a thaw hma in zu ala va dawn hlawl a nih.

Operation sung chun Doctor pa chun damte tea Charlie ṭawngṭai chu a hriet thei zing a. Chuongchun, operation chu an zo ta a. Zana chun doctor pa chu a in thei naw a. Charlie ṭawngṭaina chu a lungrila a um zing a. Zingkar hospital tieng a va fe chun, an rik zuol hai laia mi 16 an thi tah thu an hril chun Charlie a ṭhang le ṭhangnaw thu an dawn nghal a.

Charlie chu imu inhnik taka a in thu le, a ṭhang hnungin YMCA a inthawk mi pahni le chaplain R hai hungin Pathien thua inpawlpuina an nei a, hlahai khawm an sak pui thu an hril a. Chuelkhelah, ṭawngṭaina an neia, an nei zoin, hla mawi em em, “Isu ka thla hmangaitu” ti hla an sak thu le Charlie khawma hlim em em a a sak thu an hril bawk a. Doctor pa chun a ngaina a hriet rak nawh. Asanchu Charlie in na khang lawma a tuor lai khawma hla ala sak pei chu mak a ti hle.

Operation an thawa inthawka ni 5 liem hnung chun Charlie chun doctor pa chu a ko a. A hnunga doctor pa in a hril naah, Gospel sermon ka hriet hmasatak ṭum a nih a ti nghe nghe.

Charlie chun, “ Doctor, ka hun a tlung tah; nisa suok ka hmu nawk ka ring ta nawh; amiruokchu, Pathien chu inpakin um raw se, fe dingin kan pei tah; ka fe hma in ka chunga i ṭhatna leiin I kuomah lawmthu ka hril nuom a nih. Doctor, nang Juda mi ini a, Isu Krista i ring naw a; a kuomah ka fe ding an ta a, ka bula hin ngirin ka Sandamtu ringa damtaka ka chawl hadam hi mi en la ka nuom a nih” tiin a hril a.

Amiruokchu, doctor pa chu a um ngam naw a, a fe hmanga. Nisienlakhawm, a lungrila chun Charlie chu a thi thei chuong si nawh. Charlie chu Isuin a hmangaina leiin hlim takin a um a, Doctor pa ruok chu Isu Krista hnam dinga inchuktir a ni meu si. Chuongchun room chu a maksan ta a.

Minute 20 hnunga chun Doctor pa chun an hung ko nawk a. Charlie chun a hmu nuom thu a hril leiin an va ko a. Doctor pa chun a hmu tah thu le hmunawk ta lo ding a ni thu a hril a. Amiruokchu Charlie chun a hmu ngei a ngai thu an hril pek a. Chuongchun, doctor pa chun a va hmu nawk a.

Doctor pa chu a va fe chun, Charlie kut chu a va chel a, Charlie chun, “Doctor, Juda mi ini leiin ka hmangai che a nih; ka ruolṭhatak khawm Juda mi a nih” tiin a hril a. Tum ana ti a hei indawn chun, Charlie chun, “Isu Krista a nih. Ka thi hma ngeia inhmelhrietpui la ka nuom a nih. Ka thi ding an ta a, ka thil hril ding hi mi theinghil pek naw raw aw” tiin a hril a. Doctor pa chu intiemin, Charlie chun, “Ni 5 liem taa operation ei thaw lai khan i ta dingin ka ṭawngṭai a nih. I thlarau ta dingin” tiin a hril a. A hril zo sawtnawte hnungah Charlie chu a thi ta a. A thuhril hai ruok chun doctor pa chu a sun hle.

Hi indonaa hin mi tamtak an thi a, amiruokchu, Charlie Coulson an vuina chara hin hi Juda doctor pa hi a ṭhang a nih. 

Hun a hung fe peia, doctor pa chu a phutin Isu Krista hnam tu nisienkhawm, Charlie ṭawngṭaina chu dawnin a uma. A hung piengthar taa. A piengthara inthawk kum 3 an vawi chun, Brooklyn hmuah doctor pa chu inkhawmah ava ṭhang a. Pitar pakhatin a naupa chanchin a hung hril taa. A hung hril pei naa chun Charlie a nu ngei a nih ti doctor pa chun a hriet taa. Chuongchun, a doctor pa khawm chu inṭhung ṭawk ṭawk thei bik ta loin Pitar nu kut chu chelin doctor pa chun Charlie in a ṭawngṭai pêk pa ngei kha ni thu a hril tah a nih.

Thubel:

Charlie Coulson hi tleirawl te chau a nih. Amiruokchu, harsatna a hmasuon lai khawm Isu Kristaa a ringna chu an phet naw reng reng a. Ama nuna inthawk hin inchuk ding nasatak ei nei a nih. Pathien thu ei va hril thiem naw el thei, amiruokchu, mi ṭhenkhat bible tiem sun ei ni thei. Ei nun khalna kawngah Pathien thu ang taka nun khal dingin tiemtuhai po po ei infiel a nih.