Charlie Kirk: Preaching Christ in an Age of Resistance

Changer ni 14, 1993 in Arlington Heights, Illinois ah Charlie Kirk hi a pieng a. A hming tak chu Charles James Kirk a nih. Insung pangngai taka seilien a nih.  Pawl 5 a niin a hringna Pathien kuomah an hlan a, ama ngei khawma thutlukna ka siem lai po poa ka thawfuk tak a ti nghe nghe.

Harper College a kaiin, inchuk zo loin a tawp san a. Kum 18 a niin kum 2012 khan Turning Point USA (TPUSA) in 2012 a ṭan a. TPUSA thiltum chu conservative hai ngaidan- sawrkarna suk chin, sumdawngna suk zau le suk thawveng, mimal mawphurna tihai hi ṭhangthar hai laia tunghet a nih. Thil chitea intan chu a hung inthang lien pei a, America khawmuolpui a hung fang suok a.

Amiruokchu, hienga an hung hlawtling pei khawm hin Kirk chun pawimaw a ti em em chu Krista chanchintha hi a nih. Politics hai khawm a pawimaw lai zingin mihaiin an mamaw tak chu Sandamtu Isu a nih ti hi a hmu chieng em em a, a ngaipawimaw hle bawk.

College campus a hai inchuklaihai leh an ngaidan inangnawna hai a hriltlangpui hlak a. Hieng huna hai khawm hin uolau takin a ringna thu a hril rawp. 

Huoisen takin ama le ngaidan inangnawhai an debate pui el chau ni lovin, Krista chanchintha hi a hril sa pei a, US in “zalenna” an suong em em khawm hi an nghatna bulpui Pathien Thu ṭhang lo chun ieng rak a ni naw ziethai a hril tawl hlak.

Hienga a thawn hin a hung langsar ta pei a. Politics tieng thil el thlur lovin chatuon dai thutak tieng chun mi tamtak a kawk hmu a. Inchuklai tamtak kuomah America zalenna khawm hi an thuoitu hmasahai lekha zieka an hmu el ringawt ni lovin, Bible a inthawka an lak suok ngei a niziehai fie takin a hril hlak bawk a nih.

TPUSA a hung inthanglien pei a, kohran le pastor hai khawma rawngbawlna hlawk lem an nei beiseiin TPUSA Faith chu an hung ṭan a. Pastor Rob McCoy le inthawpin, kohran hi to tawk tawk el lova Krista khek suok pui ding ei nizie hai an hrila, chu tieng chun hma an lak bawk a nih.

Ama, Kirk ta ding chun a ringna kha a sira a suklang mei mei ni lovin an nghatna bulpui a nih. Thenkhatin politics le sakhuona a kei hnai taluo dam hi an sawisel a. Sienkhawm, selkaltuhai hmaah a zam ngai nawh. Selkaltu an tam po leh chanchintha thu hril a pawimaw ziet a hmu a, hmatieng pan ṭâl ṭâlin, a ringtu chanpuihai huoisenna thar pe in, ringtu ni lohai in enfie le inngaituo dingin thu a hril hlak a nih. Ṭum khat interview an thaw naah lo thi ta ding ni la, ieng anga hriet am i nuom a tia zawna an indawn chun, Kirk in ka ringna ta dinga ka huoisenna hin hriet zing ka nuom a ti ngat a nih. 

Kum 27 a niin Erika leh an innei a, nau pahni ditum deu deu an nei. 

An thilthaw mi hriet a hung hlaw pei a, conservative hai laia mi pawimaw pawl hung niin, Donald Trump le khawm an inthlawp nasa hle. Kum 2024 US election khawm kha annihai zara hratna chang a nih ti inla inkhel kher naw nih. Sienkhawm, hienga a hung inlar a, milien hai laia tiem thei a hung ni hnung khawmin Krista thu hril a ma chuong nawh. 

Ama hi college kai lo nisienkhawm lekhabu a tiem rawn em em a, a thluok a lo tha bawk leh ama le ama inzir fawm peiin, hmatieng a fe pei a. Naupang haiin Pathien thu an indawnna hai dawn dan tha lem le indik taka a dawn theina dingin PAstor Rob McCoy, Frank Turek tihai hi a rawn rawp hlak bawk a nih.

Thlaram ni 10, 2025 khan Utah ah Campus tour an nei naah nunrawng taka kap hlumin a um a. Sienkhawm, a damlai nekin thu a hril nasa lem a nih. Mi tamtak el, biekin khawm pan nachang hre lo haiin biekin an pan phaa, tamtak bible tiem ngai lo haiin bible an tiem phaa, mi tamtakin Krista ta dingin an hringna an inhlan bawk a nih. 

Political activist el ni loin, evangelist khawm a ni a. Thangthar tamtak Pathien kuomah a thuoilut a. An fui rawn tak chu innei a, nau le te neia, Pathien le inzawmna thatak nei hi a nih. 

Khawvel hmun dang danga le US sunga khawm mi tamtakin an sûn a. Chulai zing chun a hmupeinaw hai chu an hlim em em thung. 

TPUSA committee chun Charlie Kirk thlaktu dingin a nuhmei Erika Kirk chu CEO dingin an ruot a, Charlie Kirk a program lo induong lawk hai chu ruoltha hai leh sukpuitling vawng an tum bawk a nih. 

Thlaram 21, 2025 khan inthlana hunser hmang a ni a. Mipui tamtak an fe khawm el bakah news media outlet tamtakin an cover bawk a nih. Hi huna hin America a mi pawimaw hai Trump le a cabinet haiin thuhrilna hun an nei tawl bawk a, chu el khelah a ruolhai le ama lo thangpuituhai le a nuhmei Erika Kirk in thuhrilna an nei bawk bakah tulaia contemporary christian music tienga inlar tamtakin praise and worship an thuoi bawk. Inpakna hla sak le thuhril phawtin an hril chu Isu Krista a nih. A nuhmeiin Charlie Kirk thattu ka ngaidam tia thu a hril lem khan chu a hmuna um le phone le TV a lo entu tamtak mitthli khawm a tla nghe nghe. 

Mi tamtak chun an sawisel a, Pathien thu phaw a hmangin politics an khêla ti khawm an um. Amiruokchu, Tirko Paula in, “Krista thu an hril leiin ka lawm a nih” a lo ti angin, America chau ni lo, khawvel pumpui Kirk thina hin a fangsuok a, Krista hming nasatakin indarin, ringthar tamtak an um bawk a nih. Ram tinah kraws thina hlu hi, hung inthang sienla a ṭul ngei!

Thlaram 25, 2025