WHY ME?

Tennis khawvela hming dei ngai ta lo ding pakhat chu Arthur Ashe a nih. Ama hi American niin, mi dum a ni a. Wimbledon, US Open le Australian Open singles title la thei mi dum umsun a nih. US khawma an chawimawi a, Flushing meadows a a court ropuitak le khawvela tennis stadium lientak khawm ama hming chawiin Arthur Ashe Stadium tia inbuk a nih. 

Kum 1980 khan inkhel a chawlsan a, a lung tieng infuknaw leiin kum 1983 in heart bypass surgery an thaw a. Hi ṭum hin thisen an peknaah an lo fimkhur tawk naw leiin HIV a kaia. Kum 1992 khan khawvel hrietin a natna invawi hi a puong suok a nih. Chu taka chun fan mail a hin pakhatin “iengleia Pathienin hieng ang natna ṭhalo taka na dingin a thlang che am ning a ti maw” tiin zawna a siem a. Arthur Ashe dawnna hi vawisun chena a nopui dawm hai neka hriet lar lem khawm ning a tih. Ashe chun naupang tam takin tennis an inhnel thu in a ṭan a. Amiruokchu tlawmte chauvin fak zawngna in an hmang thei a. Chu tlawmte hai laia chu ṭhenkhat chauvin nopui an dawm a nih. Wimbledon nopui ka dawm lai khan Pathien kuomah “iengleiin am kei?” tiin kan dawn nawa, tuhin natna in a mi tlakbuok phingin Pathien kuomah “iengleiin am kei?” tiin indawn nawng ka tih tiin a dawn a nih. 

Khawvela cheng ei ni lei hin nun hadam le inhawi hi ei thlakhla seng a, chu ding chun ṭhang khawm ei khaw zing. Amiruokchu khawvela cheng ei ni leiin chu chu nei thei chu a ni nawh. Nitinin ei inrim a, a chang lidama intawl angin hringnun an hawia, a chang ruok chu suorsiet ei hmasuon a ngai hlak. An hawina le rinumna hi an intlawn zing amani aw ti dingin a um a, an hawina hman nek hin harsatna le rinumna hi a tam lem hman hman annawm a nih. 

Hringnun a hin “Why Me?” tina ding hi a lo tam nuom fut. Malsawmna ei dawnghai hi eini thaw suok rawm ei sawn hlak a, a mi petu nekin a malsawmna hi ei thlir lem a, ei thilthaw thathai ei suong nuom vieu. Harsatna a hung tlung hunah, ei sir le vela hai ei en a, eini chana a tlat bik dam hi ei hrietthiem ngai nawh. Suola insieng ei nina ma’n, chapo hi a lo awl khawpel. Hi khawvela hin khuolcham el chau ei nih ti ei inhriet a, amiruokchu a chawngpu nina chang hi ei tum rawp. Nu le nau ei hung neia, thlakhla ding chu a tam nuom em bawka a nih. Chulaizing chun, ei tumram, ei chak ram chu chungtieng khi ni zing sien, hi hringnun tawite, kutpha bawp chen chau, hlohna ang chauva hin rinumna le harsatna’n mi’n tuokpui zing sienkhawm, hringna mi petu le mi sandamtu, malsawmnaa mi vurtu tieng hi thlir thei zing inla chu tlawmin ei inthuok thei deu khawm ring a um. Ama chun a mi ngaituo si a. 

Mani chanchin ziek hi thil inhawi rak chu a ni nawh. Amiruokchu hilai kila ngaituona thil ramtin kan zawtnaa hin hang huoilut chu a pawi dim a nih tiin tawite la zuk thairang hram lang. Kum 30 val, mani khata cheng le in enkawl, hmelhrietlo ramah, sung le kuo umnawnaa cheng le khawsa hlak kha tuhin chu a bu ka hang kim ve ṭat taa. A kim lo hang kim zet chu hringnun hi a luong ziei ziei el a nih. Pathien malsawmna dawngin, kan nu khawm a phing a hung puom ṭan taa. Lawmna an sang hle. Chu ruol ruol chun beidawngna a hung invir lut nawk a. Kan nu hi a thisen a lo tlawm deu leiin damdawi fak dinga an pek chu a hung thlawhlaa. A lungkhur lai na ti taluoa inrum hlat hlata a hang inkuoi chawr chu inkhat pa ek che ṭhungin ei ṭhung el hlak nih. Thereng man chu a ri bek ala sie a. Ri khawm ei nei pei nawh. Thaw thei rak hlak innei lo. Patling ni a harsa nuom hle. Hieng hin zantin deuthaw a um hlak a. July ni 7 zan khan a siruk lak ni awm takin, zan bufakkhawpin an kuoi chawr a. A hung bo nawk el dim tiin kan hang nghak a, inhawi pek thei chuong lo. Sung le kuo zuk inpun dingin kan pahni chau hi sung le kuo kan i nei chu kan ni el si. A beidawng um kher el. 

Zanril a ni ṭep ta si leiin, damdawi in fe dingin thu kan suk thluk a. Auto hai khawm an lo inlawi tawl ta leiin kan dak bawm sempa ka zuk biek a. Ama hi ringnawtuhai thiempu a ni leiin zingkar dar li a chenve hin temple ah sin an nei hlaka. Ka zuk biek chun a lo zal tah. Amiruokchu, auto mi ko pek nekin a matawr hung chawiin, damdawiin a mi fepui ta lem a. Damdawiin chu zanrilin kan tlunga. Veng tieng chu Portugal le Spain ballpet en tumin ṭhalai ruol chu ngathu mit angin an la meng deu far a. Nu le pahai zuk hril dingin an lungril a sawl ding leiin ka hril nuom naw a, anachu hril naw tawp nek chun tiin kan sanghai thil umdan ka zuk hril a, zingkar nu le pa an tho hunah lo hril sawng el dingin ka ti a. 

Chuonga damdawi ina kan nu na ti doctor le nurse haiin an buoipui nak nak lai chun, “Why me?” hin lungril a fang nasa khawpel. Nuor thusim lem chu kan zawt nawh, amiruokchu sung le kuo tamna hmuna um bek ni inla tiin nuor chu ka nuor deu. Chulai chun Arthur Ashe chanchin hi lungrila a hung thar a. Malsawmna ka dawng zozai hai ka hang thlir kir a, a malsawmnain mi vur naw sienkhawm, suol bawia intang a mi sansuok ringawt khawm hi a hun veileh, a malsawmnain nasatakin a mi vur a, malsawmna ka dawng lai khan “Why Me?” hi ka lo ti ngai nawh. Harsatna chite kan tuok dek dek a, “Why Me?” ka zuk ti nuom nghal el chu inzakum ka ti thar hle. 

Isai 43 a chun, “tuihai in pal kai laiin um ka ta in kuomah” tiin a lo hril a. Tui pal hi chu thil inhawi bek bek chu a ni nawh. Inchei hnung lem hin chu thil lawmum lo a nih. Kan umna rama khawm hin ruo hi a sur rawna, a chang chu a bawhawk a sur hlak. Tui pal a ngai chang a um rawp. Thil inhawkum tak chu a ni nawh. Amiruokchu tum ram tlung ding chun a ngai si. Pathienin tuihai in inhêl laiin a ti naw a, tuihai sira inlawn laiin khawm a ti nawh. Tuihai ei pal hi chu a phal a. A chulaizing chun a thlamuongum bek bek chu, tuihai pal inla khawm, “um ka ta in kuomah” a ti hi a nih. A mi maksan ngai nawh. Ieng angin zan inthim sienkhawm, a kutin a mi lo chel zing lem si. Mal taka um angin inhre hlak inla khawm, malin a mi’n umtir si nawh. Vangduoia inngai pa hi mi hamtha ka lo ni lem zing. Harsatnahai hi dit chu a um nawh, natnahai khawm, amiruokchu ama kuom mi keihnai tu an lo ni si. Pathien zui hi insirna ding a lo um naw a, khawvel mihai laia cheng niin, harsa ti hlak inla khawm Lalpa imi ngaituo!

Eventide

25 Thlahmur, 2026