Hunin a theinghil

​Hun hi rukru ang a lo nih. Ei hunhai inru zovin, a sakhmingah hringnun ei inbuk ve ritawl a. 

Thikna lei ni thei a tim? Rimtui rim a châm sâwt anga, liemta hnunghai an cham zing hlak leiin, a mi thik a ni rawi mawh. 

Siekhawm liemtah le hmatieng inkarah chatuon ka tawng a. Ka chatuon ruok chun tawp chin chu a nei, amiruokchu a huntawk. 

Hlun lo ni si hin ei châmna dingin iengkim ei peka. A chu hringnun mawina chu a ni el am? Thlapa khawm var zing bik lo a. Tuipui khawma vapang a chel det tlat thei bik amanih? A hunga, a kir nawk hlak. Arasi hai khawma mani in kâng ralin an var suok lem annawm. Châm zing ding iengkhawm um lo. 

Chuong nek chun, mipui laia inhmu nal thei, thlaphang changa ka kut hung mai hlaktu kut lum hlat hlat dam, kei di’n thilmak derdep tak ni si hi tawng rawp ka nuom lem. 

Tukvera nisa var a hung lut angin, damte’n ka hringnunah a hung luta. Tuhin chu tawite inhlat khawm khawsawtna’n a mi zem. 

A chang hin chu lam inṭhehai ka ngaituo hlak. Hi khawvela lam tamtakhai dam. Lam dang dei hraw thei ei ni lai zingin, lam ṭhenkhat hringnun dang dei min hmangtir theitu dam, hmelhriet lo anga min um tir theitu dam ka ngaituo chang hin ṭitna’n a mi man rawp hlak. Hmangaina hi a lo mak ngei! 

Lampui tamtak, ni thei tam tak, chu laiah hi hi. 

Phalbi a hung ding hre zing khawma pârhai chu an pâr a. Nisa suokin thlangtieng kâwla a liem ding a hriet. Arasi mawitakhai khawm anni an chawk leia mawi an nih. Thil mawi tinreng hin tâwp hun an lo nei pei a nih. 

Kumhai liem pei hin ei sakhmelhai a suk awngrawp zova, vun marlai chu hrietzingnaa chau a châm huna khawm, khawvel ri inringin, eini’n ri nei pei ta naw inla khawm, ei vullai hi hrietzingnaa bek sawm pei ei ti maw. 

Chatuon hi um zing ding tina a lo ni naw rawi mawh. A chu nek hmanin, hi kawvelah a ruola ei cheng hi, Pathien ditsak bika ei lampui an kawp dam, ei hringnun ei hang ti thei el dam hi. 

Van thengreng hin a lo ngai a ni chun, a thlasik lam dam, a arasihai dam, a vadung le tlangmawihai le hrietna a inkhawlkhawm hai hi vawng tlat sien. 

Kei chun chuonghai chu ka mamaw nawh. 

Chu nek chun nangma tawng dinga thilmak hi, mi pe nawn rawp raw sen. Hringnun tawite ei nei sung hin, nitinin a thara tawng zing che ka nuom. 

Chun, hunin, 

Mi kei ṭhe tuma a ṭhang khawna bansan a, a mi’n ruk pek ding theinghila kutbentheka a kir nawk chenin.